សៀមរាប៖ ព្រះរាជដំណាក់ ក្បែរព្រះអង្គចេក ព្រះអង្គចម ដែលឆាបឆេះកាលពីយប់ម៉ោង១០ ថ្ងៃទី១២ ខែមីនា ឆ្នាំ២០២៣ គឺបណ្តាលមកពីឆ្លងចរន្តអគ្គិសនី (ទុស្សេខ្សែភ្លើង)។ នេះជាការអះអាចរបស់ក្រសួងព្រះបរមរាជវាំង នៅព្រឹកថ្ងៃទី១៣ ខែមីនា ឆ្នាំ២០២៣។
ក្រសួងព្រះបរមរាជវាំងបានបញ្ជាក់ថា៖ «សូមប្រកាសជម្រាបជូនសាធារណជន មេត្តាជ្រាបថា នៅយប់ថ្ងៃទី១២ ខែមីនា ឆ្នាំ២០២៣ វេលាម៉ោង២២:០៥នាទី មានអគ្គិភ័យបានឆាបឆេះអគារព្រះរាជ ដំណាក់តូច នៃព្រះរាជដំណាក់ខេត្តសៀមរាប ដែលបណ្ដាលមកពីការឆ្លងចរន្តអគ្គិសនី (ទុស្សេខ្សែភ្លើង)»។
ក្រសួងព្រះបរមរាជវាំង បានបង្ហាញក្តីសោកស្តាយជាពន់ពេក ចំពោះព្រឹត្តការណ៍ដែលបានកើតឡើងកាលពីយប់មិញនេះ។
គូសបញ្ជាក់ថា ព្រះមហាក្សត្រនៃកម្ពុជា នឹងយាងជាព្រះរាជាធិបតី ក្នុងព្រះរាជពិធីសុំភ្លើង «ព្រះអគ្គីកីឡា» នៅប្រាសាទអង្គរវត្ត នាថ្ងៃទី២១ ខែមីនា ឆ្នាំ២០២៣ ដែលជាពេលវេលាដ៏ល្អ ព្រះអាទិត្យរះចំពីលើកណ្តាលកំពូលប្រាសាទអង្គរវត្ត ដើម្បីរៀបចំធ្វើជាភ្លើងគប់រត់នៅខេត្តសៀមរាប និងបណ្តាប្រទេសក្នុងតំបន់អាស៊ាន សម្រាប់ស៊ីហ្គេមលើកទី៣២ ឆ្នាំ២០២៣។ ព្រះមហាក្សត្រខ្មែរ ទ្រង់នឹងគង់ប្រថាប់នៅក្នុងព្រះរាជដំណាក់ខេត្តសៀមរាប ប៉ុន្តែជាអកុសលព្រះរាជដំណាក់នេះត្រូវបានព្រះអគ្គីឆាបឆេះ៕
